Raajje Inside

ސިޔާސީ ޕާޓީއަކަށް ވަދެގެން ބަޔަކު ކުފުރުވަންޏާ ، ﷲ ގެ ޝަރީޢަތަށް ފުރައްސާރަކޮށް ، ﷲ ބާވައިލެއްވި އާޔަތްތަކަށް އިންކާރުކުރާމީހާގެ ކުފުރަކީ މާ ސާފު ، އޮޅުމެއްނެއް ކުފުރެކެވެ. 

ސިޔާސީޕާޓީއެއްގައި މީހަކު އުޅުމަކުން އަދި އެއީ ކާފަރެއްނޫނެވެ. އެއީ ކިތައްމެ ބޮޑު ޢިލްމުވެރިޔެއް ސިޔާސީ ޕާޓީއެއްގައި އުޅުނުކަމުގައި ވިޔަސްމެއެވެ. އެހެންނޫންކަމަށްވާނަމަ މިހާރު ، އައި.އެފް،އެމް ގެ ޢިލްމުވެރިންގެ މަޖްލީހުގެ ނައިބުރައީސް ، އެމް.ޑީ.ޕީ އަކަށް ނުވަނީހެވެ. އެހެނަސް ޑިމޮކްރަސީ އަކީ ކުފުރުގެ ނިޒާމެއްކަމާއިމެދަކު ޝައްކެއްނެތެވެ. 

ޢިލްމުވެރިންގެ ވަޒީފާއަކީ ވެރިން ނުބައިމަގުންދާނަމަ އެބައިމީހުންނަށް ނަސޭހަތްދީ އިސްލާޙުގެމަގަށް އެޅުވުމަށް މަސައްކަތްކުރުމެވެ. އެއީ ރީތި ގޮތުގައެވެ. މަގުމައްޗަށް ނުކުމެގެންނެއް ނޫނެވެ. އެވެރިން ފަޞީހަތް ނުވާނޭގޮތުގެ މަތީންނެވެ. ނަމަވެސް ބަސް ޤަބޫލުނުކޮށް ، ޢިލްމުވެރިންގެ އަޑުނާހައި ، ފަސާދައާއި ޝިރުކާއި ޚުރާފާތްތަކާއި ފާޙިޝްކަންތައްތައް ފަތުރަންފެށީމާ ، ދެން އެހެންގޮތެއް ހޯދަންޖެހެއެވެ. އެއީ އެތަނެއްގެ ޢިލްމުވެރިން ކުރަންޖެހޭނޭކަމެކެވެ. މައުމޫނުގެ ވެރިކަމުގައި ދީނީ ދަރުސްތަކުގައި އައްޝެއިޚު އިބްރާހިމް ފަރީދު ވަނީ އެކަން ކޮށްފައެވެ. ޝެއިޚު ވަނީ އޭރުގެ ސަރުކާރުން ހިންގާ ފާޙިޝްކަންކަމުގެ ވާހަކަ އާއްމު ދަރުސްތަކުގައި ދައްކާފައެވެ. ސަރުކާރަށް އެއްވެސް ގޮތަކުން ސިޓީއެއްގެ ޒަރީޢާއިންވިޔަސް އެކަން ހުއްޓާލުމަށް ނަސޭހަތްތެރި ވިކަމެއް އެނގޭކަށްނެތެވެ. ކޮންމެއަކަސް ދުލުން މުންކަރާތް ނަހީކުރުމަކީ ޢިލްމުވެރިން ކުރަންޖެހޭކަމެކެވެ. ނަމަވެސް ހިތާމަޔަކީ މިއަދު ، އަނެއްވެރިކަމުގައި ޝިރުކު ފަތުރައި ބުދުތައް ރާއްޖެއަށް އެތެރެކުރެވި އާއްމުކޮށް މުސްލިމުންގެ މެދުގައި ބަހައްޓައިފައި ހުރި އިރުވެސް އެކަން މަނާކުރަން ޗުއްޕުވެސް ނުބުނާތީއެވެ. ރަސޫލު ބޭކަލުންގެ ދަޢުވަތުގެ އަސްލަކީ ޝިރުކު ނައްތާލުން ކަމަށް ވީއިރުވެސް މެއެވެ. އަނެއްކާ ފާޙިޝް ޢަމަލަކާއި ، ޝިރުކާއި އަޅައި ކިޔޭނީ ކިހިނަކުން ކަމެއް ނޭންގެއެވެ. އެހެންނަމަވެސް ، އޭރު ވެރިމީހާއާއި ދެކޮޅަށް ނިކުމެފަ ، މިއަދު މިވީ މޫގަނޑުގައި ދަތްއަޅައިގެން އޮންނާށެވެ. މިއީ ވިސްނާ ވިސްނާ ފަހުމު ނުވި ކަމެކެވެ. 

މި ދާދިފަހުން ރާއްޖޭގެ އިތުބާރުހިފޭ އެންމެހައި ޝެއިޚުން އެއްބަހެއް ކިޔައިގެން ސަރުކާރު ޒިންމާދާރުކުރެވޭނެ އެހެން ގޮތެއް ނެތިގެން ، ޝިރުގެ ވަސީލަތްތައް ފެތުރެމުންދާތީ އެކަން ހުއްޓުވުމުގެގޮތުން އެއްވުމެއް ބާއްވަން އުޅޭތީ ރާއްޖޭގެ ޝެއިޚަކު އެކަން މަނާކުރަން އުޅުނު ގޮތުން ހައިރާންވާން ޖެހުނެވެ. އެއީ ވެރިމީހާއާއި ދެކޮޅަށް ނުކުތުން ހުއްދަ ނުވާނެކަމަށް ބުނެއެވެ. އެއްވުމަކީ ވެރިކަމުގެ ފަރާތުން ހުއްދަ ދޭ ފަދަ އެއްވުމެއް ކަމަށް ވީއިރުވެސް މެއެވެ. ފާޙިޝްކަންތަކާއި ، ލަވަޔާއި މިއުޒިކާއި ، ޣީބަބުނުމާއި ދެބައުޑުވުމާއި ، އަންހެނުން އައުރަނިވައި ނުކޮށް ހުންނަ މަންޒަރުތައް ދައްކާ ޓީ.ވީ އެއްގައި ، މި ކަމަށް ގޮވާލީމައި ހައިރާންވެއްޖެއެވެ. އެހެނީ ދީނީ ޖަމިއްޔާއަކުން ، ކާނިވާ ސަރަހައްދުގައި ، ސްޓޭޖުގައި ދަރުސެއްބާއްވާން އުޅުމުން ، އެއީ ފާޙިޝް ލަވަޔާއި މިއުޒިކާއި ، ދެ ޖިންސު މަސްހުނިވެގެން ނެށުމާއި މިފަދަ ކަންކަން ކުރާ ތަނަކަށް ވާތީ އެކަންކަން ފެތުރުމަށް ހިއްވަރު ލިބޭނެކަމަށް ބުނެ ، އެ ޖަމިއްޔާއަށް އެތާ ދަރުސް ނުބޭއްވުމަށް ޝެއިޚަކު ނަސޭހަތްދިން ވާހަކަ ދުވަސްތަކެއް ކުރިން ވަރަށް ގަދަޔަށް ފެތުރުނެވެ. 

ކޮންމެއަކަސް ދީނީ ޢީލްމުވެރީން އައީ މިހާރުގެވެސް އަދި ކުރީގެވެސް ، ވެރިމީހާއަށް ނަސޭހަތްތެރިވަމުންނެވެ. ނަމަވެސް ފަސާދަ ފެތުރުމުގައި ހައްދުފަހަނަ އަޅައިދިޔުމުން ދެން، ބަޣާވާތް ނުކުރިކަމުގައި ވިޔަސް ކޮންމެވެސް އެހެން މަގެއް ޚިޔާރުކުރަން ޖެހުނީމައި ޚިޔާރުކުރީއެވެ. އަނިޔާވެރިކަމާއި ދެކޮޅުވެރިކަމާއި އެކުގައެއް ނޫނެވެ. ދީނީ ޢިލްމުވެރިން އެއްވުމެއް ބާއްވައި ސަރުކާރަށް ޕްރެޝަރު ކުރަންޖެހުނީ ސަބަބުތަކެއް ހުރެގެންނެވެ. ހަމަ ހުރެލާފައި އެކަން އެގޮތައް ކުރީއެއްނޫނެވެ. 

އަދުގެ ސަރުކާރަކީ ދީނީ ޢިލްމުވެރިންގެ ބަސް ނާހާ ބައެއްއުޅޭ ސަރުކާރެއްކަން ، އެންމެ ރަނގަޅަށް އެނގޭނީ ޝެއިޚަށެވެ. ޝެއިޚުވެސް އެމް.ޑީ.ޕީން އިސްތިއުފާދިނީ އެންމެ ސަބަބަކަށްޓަކައެވެ. ކޮންމެހެން ޕާޓީ ސިސްޓަމް ގޯސްވެގެންނެއްނޫނެވެ. http://www.miadhu.com/dv/?p=3663 ދީނީ ޢިލްމުވެރިން ރީތިގޮތުގައި ނަސޭހަތްދޭއްވީ އެންމެހައި ރައްޔިތުން ޝިރުކާއި ލާދީނީ ވަޅުގަނޑަކަށް ވެއްޓި ނިމެންދެންތޯއެވެ. އެންމެކައިރިން އިސްލާމިކް މިނިސްޓަރު ކިތައްފަހަރު ބުދުތައް ނަގަން އެންގިތޯއެވެ. ގަބޫލުކުރަންޏާ މިނިސްޓަރ ގެ ބަސް ގަބޫލުކުރާނެއެވެ. http://manadhoolive.com/15820 ސަރުކާރަށް ކަންކަން ރީތިގޮތުގައި އަންގައި ދެވޭނީ ވަކިވަރަކަށެވެ. http://www.miadhu.com/dv/?p=47542 ދީނީ ޢީލްމުވެރިން ހިމެނޭ އަދާލަތު ޕާޓީންވެސްވަނީ ސަރުކާރަށް މީގެކުރިން އެތައްގޮތަކުން ކަންކަން ހުށަހަޅުއްވާފައިކަމަށް ޕްރެސްސެކެޓްރީ ވަނީ އިޤްރާރުވެފައެވެ. ނިކުންނަން ޖެހުނީ ޢިލްމުވެރިންގެ ބަސް ނާހައި ، ފަސާދަ އިތުރުކުރަމުންދާތީއެވެ. http://www.sun.mv/13653 ސަން އޮންލައިންގެ މި ޚަބަރުގެ 3 ވަނަ ޕެރަގްރާފު ކިޔާލެއްވުމުން މިކަން ޔަގީންވެގެންދާނެއެވެ. ދީނީ ޢިލްމުވެރިން ރާއްޖޭގެ އެންމެ އިސްވެރިޔާއާއި ބައްދަލުކުރަން އެތައް ގޮތަކުން އެދިފައިވެއެވެ. އެމް.ޑީ.ޕީ ގެ ދީނީގޮފީގެ ކުރީގެ ރައީސް ބީ.އޭ ނަސީމްވަނީ ވެރިމީހާއާއި ބައްދަލުކުރުމަށް އެތައް ސިޓީއެއް ފޮނުވާފައެވެ. އެންމެ ސިޓީއެއްގެ ޖަވާބުވެސް ނުލިބޭކަމަށް އެބޭފުޅާވިދާޅުވިއެވެ. ރީތި ގޮތުގައި ނަސޭހަތްދެވޭނީވެސް ބައްދަލުކުރެވިގެން ނޫންހެއްޔެވެ.