Raajje Inside

ތެދެކެވެ. ނިމިގެން ދިޔަ މުޒާހަރާ ހިތައް ގެނުވައިދިނީ ފިނިކަމަކާ ޔަޤީންކަމެކެވެ. އުފަލާއި ހިތްހަމަ ޖެހުމެކެވެ. އެންމެން ހެކިވާނޭހެން ރޭގެ މުޒާހަރާއަކީ އެންމެ ސުލްހަވެރި އެންމެ ބޮޑު އަދި އެންމެ ރޭވުންތެރި މުޒާހަރާއެވެ. ދީނީ ގޮތުން ބެލިޔަސް ސިޔާސީގޮތުން ބެލިޔަސް ވިސްނޭ މީހަކުވެއްޖެޔާ އެ މުޒާހަރާއާ މެދު ބުނަންޖެހޭނީ.. WOW އެވެ.

އެތައް ގޮތަކުން މި މުޒާހަރާ ކާމިޔާބެވެ. އެހެނަސް ޕާރފެކްޓް ނުވުމަކީ މައްސަލައެއް ނޫނެވެ. މިކަހަލަ އިވެންޓަކާއި ގާތްކުރާ އިވެންޓެއްވެސް އަހަރެން ހަމަ ގައިމު މިދީބުން ނުދެކެމެވެ.

ފުރަތަމަކަމަކީ އިންތިޒާމެވެ. އެމް ޑީ ޕީން ހީކުރިގޮތާއި ހިލާފަށް މުޒާހަރާވަނީ އާދަޔާ ހިލާފަށް ދިގުދެމިގެން ގޮއްސައެވެ. އަދި ލިބުނު ޝޮކަކާއި އެކު އެމީހުނަށް އެކަން ހުއްޓުވަން މަޖުބޫރުވިކަހަލައެވެ. އެހެނަސް ކުރާނެ ކަމެއް ހަދާނެގޮތެއް ނޭނގިފަ ތިބެންޖެހުނީ ރޭވުމުގެ ކުޅަދާނަކަމުންނެވެ. އެހެނީ އެގޮތައް ދިގުދެމިގެން ދާނެ ކަމީ ކުރިން އިއުލާންކޮއްފައި އޮތް ކަމެއްނޫނެވެ. އެހެން ކަމުން ވަޅޯ ބޮނޑިބަތްކޮޅެއް ކައިގެން އެކަކުވާހަކަ ދައްކާފައި 600 ވަރަކަށް މީހުންގެ "މެދުމިނަށް ތާއީދު" ރޫޅާލީ އެކަން މޭރުންވެފައިވެސް ނެތުމުންނެވެ. މީގެ ސަބަބުން ބޮޑު ކުރިމަތިލުމަކުން ވަރަށް ބޮޑައް ސަލާމަތްވިއެވެ.

ދެވަނަކަމަކީ އަންހެނުންގެ އިންތިޒާމެވެ. އަންހެން ފިރިހެން އެއްކޮށް މަސްހުނިވެގެން ކުރާ މުޒާހަރާއެކޭ ކިޔައި މީހުންގެ ހިތުގައި ރުޅިވެރިކަން އުފެއްދުމަށްކުރި ހުރިހާ މަސައްކަތެއް ފެނައް ދުއްވާލައިފައި އަންގާލަދިނީ އިސްލާމީ ރިވެތި އުސޫލުތަކެވެ. އަންހެނުންނަކީ ދީނީ މީހުން ގޭގައި ތަޅުލައި ބަންދުކޮއްފައި ތިބޭ ބައެކޭ ބުނި ބުނުން އަނބުރާ އަނގަޔަށް ވައްދަން މަޖުބޫރު ކުރުވީ އެކަން ރާވާފާލެއް ފުރިހަމަކަމުންނެވެ. ރުޅިއަޔަސް އެކަމަށް ސަނާ ކިޔަން މަޖުބޫރުވީވެސް ހަމަ އެހެންވެގެންނެވެ. މޫނު ބުރުގަލަށާއި ދީނަށް މަލާމާތްކުރާ މީހުންގެ އަނގަތައް 8 ގަޑިއިރު ހުޅުވާލައިފައި ބެހެއްޓީ އަންހެންވެރިންގެވެސް ކުޅަދާނަކަމުންނެވެ.

ތިންވަނަކަމަކީ ސުލްހަވެރިކަމެވެ. ތަޅާފޮޅުމުގެ ޖޯޝުއަންނަ ކޮންމެފަހަރަކު ދުވެގޮސް ތަޅާމަރައިގެން ނުވާނޭކަން އަންގައިދިނެވެ. އަދި ކެތްތެރިވުމަށް އެންމެ ބޮޑަށް ބާރުއެޅި މުޒާހަރާއަކީވެސް އެހެންކަމުން މިއީއެވެ. އިތުރު ބައެއްގެ އަތްދަށުގައި އެވަރުގެ ބޮޑު ޖަމާއަތެއް ކޮމާންޑަކަށް މަޑުކޮއްގެން އޮތްނަމަ ރޭގަ އެމް ޑީ ޕީ މުޒާހަރާކުރި ހަރުގޭގައި ދިރިހުރި މީހަކު ނުބަހައްޓާނޭ ކަމަކީ ޔަޤީނާ ގާތައް އެނގޭކަމެކެވެ. އެހެނީ އެތަނުގައި ތިބި ކުރައުޑުގައި ވަނީ ޖޯޝުގައި އަޤީދާއަށްޓަކައި މަރުވާން ތައްޔާރައްތިބި އެތައް ބައެއް ހިމެނިފައެވެ. އެހެނަސް ސުލްހަވެރިކަމާއިއެކު ނިންމާލި ނިންމާލުމަށް ސާބަހެވެ. ހުދު އަހަރެންވެސް ހުރީ ދުވެގޮސް ތަޅައިގަންނަހާ ފޯރީގައެވެ. އެހެނަސް މިހާރު އެކަން އެވީ ރަނގަޅަށްކަން ގަބޫލުކުރަމެވެ. އެއްބަސްވަމެވެ. ތަޅާފޮޅައި ލޭއޮހުރުވާނޭ ކިޔާ ދިން ހިތޯބުތައް ބޭކާރު ވެއްޖެކަން ޔަޤީންވިއެވެ.

ހަތަރުވަނަ ކަމަކީ ސިޔާސީ މީހުންގެ ވާހަކަތަކެވެ. ސިޔާސީ މީހުނަކަސް ރޭ އޮތީ ދީންވެރިވާން ޖެހިފައެވެ. ސިޔާސީގޮތުން މާބޮޑުއެއްޗެއް ބުނުމުގެ ފުރުސަތު ނުދިންކަމީ މުޒާހަރާގެ އަސްލު ހިފެހެއްޓިގެން ދިޔަކަމެކެވެ. އެހެނަސް އެއްވެސް ބަޔަކު ގަބޫލު ނުކުރާ ބައެއް މީހުންނަށް ވާހަކަދައްކަން ފުރުސަތު ލިބުނުކަމީ ކޮންމެސް ވަރެއްގެ ހީނަރުކަމެކެވެ. އެހެނަސް އެމީހުންގެ ބައިވެރިވުމުގައި ނުސީދާގޮތެއްގައި ފައިދާތަކެއްވެފައިވާކަން ދަންނަން ޖެހެއެވެ.

ފަސްވަނަކަމަކީ ކުރެވުނު ޑިމާންޑްތަކެވެ. އެއީ ހިތްގައިމު ޑިމާންޑްތަކެކެވެ. ރާއްޖޭގައި ކުރަން ހުރި ހުރިހާކަމެއް އެއްރެއިން ވާނޭ ކަމަށް އެކަކުވެސް ގަބޫލު ކުރާނަމަ އެއީ މޮޔައެކެވެ. ކަންކަން އަވަސް އަރައިގަނެގެނެއް ނުވާނެއެވެ. އެވަރުގެ ބޮޑުއެއްވުމަކަށް ދެވުނީ ބޮޑު އިއްތިހާދަކައިގެންނެވެ. އެހެންނޫންނަމަ ނުކުންނާނީ އެންމެ ޕާޓީއަކަށް ނުވަތަ ވަކި ބަޔަކަށް ސަޕޯޓު ކުރާ މީހުންކޮޅެކެވެ. އޭގެ ސަބަބުން އަދި ލަވާ ހަޅޭކާއި ކުރާ ޑިމާންޑަކުން އެއްކަމެއްވެސް ސަރުކާރަކަށް ނުވާނެއެވެ. އެހެންކަމުން އިއްތިހާދެއް ހަދައި އެންމެން އެއްބަސްވާ ކަންކަމަށް ޑިމާންޑްތައް ހުށަހެޅުމަކީ ރަނގަޅުގޮތެވެ. އެއީ މީހުންގެ އަދަދުގެ ސަބަބުން ސަރުކާރަށް އެކަންކަން ކުރާން މަޖުބޫރުވާނެތީއެވެ. އެހެނެސް އަހަރެންވެސް ބޭނުންވަނީ ދުވަހުން ދުވަހަށް އިސްލާމީ ޝަރީއަތް ޤާއިމްކުރަންށެވެ. އެކަމަކު އޮތީ ކެތްތެރިކަމާއިއެކު އެކަމަށް ވާސިލުވުންކަން ޔަޤީނެވެ.

އަދިވެސް އެތައް ބައިވަރު ހިތްހަމަ ޖެހޭ ކަންތައްތަކެއް ފެނިގެން ދިޔައެވެ. އުފަލުން ހިތްފޮޅުނުކަހަލައެވެ. ﷲ ދެއްވި ނަސްރެއްގެ ބޮޑުކަމަށް އެކަމަށް ޙަމްދުކުރަމެވެ. ﷲ أكبر! ﷲ أكبر! ﷲ أكبر!

މިހުރިހާކަމެއް އަންގައިދެނީ އެންމެ ކަމެކެވެ. އެއީ ﷲ ތަޢާލާގެ ބަސްފުޅުގެ ތެދުކަމެވެ. ނަސްރާއި ކާމިޔާބުއޮތީ އެކަލާނގެ ހަޟްރަތުންނެވެ. އެންމެހާ ރިވެތި ސިފަތައް ވަނީ އިސްލާމްދީނުގައި ކަމެވެ. އަންހެނުންގެ މުޢާމަލާތްތަކާއި، ހައްޤުބަސް ބުނުމާއި، ﷲ ގެ ދީނުގައި ހިފުމުގެ މުޙިއްމުކަމެވެ. ދީނާއި ނުލާ މިފަދަ މުޒާހަރާއެއް ތަސައްވަރުކޮއްލުމުން އެކަން އެނގިގެންދާނެއެވެ.

އަހަރެންވެސް ޤައުމެގެ ވެރިޔާއަށް ގޮވާލަންއޮތީ އަޑުއަހާށޭވެ! ދެކޭށެވެ! ދަންނާށެވެ! އަހަރެމެން ބޭނުންވަނީ އިސްލާމީ ޝަރީއަތެވެ. އިސްލާމްދީނެވެ. އަހަރެމެން ދީނުގައި ހުރިހާ ކަމެއްވެސް އެންމެ ފުރިހަމަޔަށް ކަނޑައަޅުއްވައިފައިވެއެވެ. އެއީ ސިވާކް ދަނޑިން ފެށިގެންގޮސް ބޭރު ޤައުމުތަކާއި މުޢާމަލާތުކުރުމުގެ އަދަބުތައްވެސް ވަނީ ބާއްވާލައްވާފައެވެ. އެއީ އެންމެ ފުރިހަމަ ދީނެވެ. އިންސާނެއްގެ ސިކުނޑިއަށް ތަސައްވަރު ނުކުރެވޭހާވެސް އެ ފުރިހަމަވެފައި މަތިވެރިވެފައިވެއެވެ. މާތް ﷲ ވަޙީ ބަސްފުޅެއްގެ މާނާގައިވެއެވެ. 

" މިއަދު، ތިޔަބައިމީހުންގެ دين، ތިޔަބައިމީހުންނަށް ތިމަންރަސްކަލާނގެ ފުރިހަމަކޮށްދެއްވައިފީމެވެ. އަދި ތިމަންރަސްކަލާނގެ نعمة، ތިޔަބައިމީހުންގެ މައްޗަށް ތިމަންރަސްކަލާނގެ ފުރިހަމަކޮށްދެއްވައިފީމެވެ. އަދި إسلام دين ތިޔަބައިމީހުންނަށް دين އެއްކަމުގައި، ތިމަންރަސްކަލާނގެ ރުހިވޮޑިގެންފީމެވެ." {އަލްމާއިދާ: 3}

އަދިވެސް ވެއެވެ.

" ހަމަކަށަވަރުން، اللَّه ގެ حضرة ގައި، دين އަކީ، إسلام دين އެވެ." {އާލް އިމްރާން: 19}

ނިންމާލަމުން އަހަރެންގެ އެންމެ ފަހުގެ އެދުމަކީ ހުރިހާ އެންމެންވެސް މި ލިބުނު އިބުރަތާއި ނަސްރާއިއެކު ﷲ ގެ މަގަށް ގޮވާލުމުގައި ހިކުމަތާއިއެކު މަސައްކަތް ކުރުމަށެވެ. އަދި ހުރިހާ ކަމަކާއި ބަހެއް ﷲ އަށް ޚާލިސް ކުރުމަށެވެ. އެހެނީ "އަމަލުތައް ބިނާވެގެންވަނީ ނިޔަތްތަކުގެ (ނިޔަތުގެ) މައްޗަށެވެ!"

الله أكبر! الله أكبر! الله أكبر!